اول مشكلة : الوحده

بحس اني كبت مقهورة نوعا ما يعني

 ماليش اخوات بنات وعندي 2 ولاد بس الكبير منهم قمة في الغلاسة كل شوية يتريق عليا وساعات بيتخانق معايا ودايما هو اللي بينتصر وطبعا بيتريق على اني لسه متخطبتش مش مديني فرصة اتكلم واللي زاد وغطى ان سيادته دلوقتي بيحب وعايز يخطب علما انه ف 2 كلية ساعات بخاف ان هو يخطب ويتجوز وانا لسه قاعدة
ساعات كتير بخاف لافضل انسة وانا عارفة ان ماليش حد ومحدش هيتحملني وساعات بتخنق من البيت واللي فيه وببقى عايزة اسيبه بس ماليش مكان اروحه
كمان بخاف حتى لو ربنا اكرمني لايطلع حظي وحش واتبلي بانسان يضايقني ويعاملني وحش

....................................

باختصار انتى بتعانى من الوحده , وخايفة منها

والسبب في ده انو ملكيش اخوات بنات تضحكى معاهم وتتكلمو مع  بعض في اللي انتى عيزاه

اما بالنسبة لاخوكى وعلاقتكم مع بعض

فبعد تجربة انا نفسي مريت بيها وتجارب انا شوفتها

فهقولك علي حاجة , ديما الاخوات كده في مرحلة بيكونو في قمة الغلاسة , بس في مرحلة هتلاقيهم في قمة الحنان يمكن احن من والدك ووالدتك , هتتشاكلو وفي لحظة تتصالحو وتضحكو وتهزرو

ومتقوليش مش هيحصل , صدقينى هتلاقيها هتحصل

وكمان ممكن بسبب انك وحيده وان اخوكى بيغلس عليكى فهتلاقي انك هتفتكري ليه كل حاجة وحشة

انسيكى من اخوكى دلوقتى ومن انو يتجوز انتى تعرفيش هو اللي هيجوز الاول ولا ,وكمان مش ممكن اللي هيخطبها دى تكون كويسة وتبقي زى اخت ليكى , خلى نيتك حلوة وصافية اتجاه الامور , فهتلاقي كل حاجة حلوة 

وكمان انتى متعرفيش ايه اللي ممكن يحصل , انتى معرفتيش اللي مكتوب فوق عند ربنا عشان تقولى كده

اما بالنسبة انك تفضلي انسة او تتجوزى واحد مش كويس

بصي انا هقولك حاجة

الجواز ده نصيب ممكن تاخيره ده في خير وربنا اعلم بكل شئ ومحدش عايزلك الخير اكتر من ربنا

يبقي تاخير الجواز انسيه لانو فيه خير ليكى

اما بالنسبة انك تاخدى انسان وحش فكري بالعقل معايا

انتى وحشة؟

انتى اخلاقك مش كويسة ؟

انتى اذيتى حد ؟

لو انتى معملتيش ده , يبقي ليه ربنا يرزقك بواحد وحش

وكمان في حاجة اسمها فترة الخطوبة فيها هتقدري تعرفيه علي حقيقتو وتعرفي يناسبك ولا لا

واعرفي انو لو زعلك

اول واحد هقف يدافع عنك هو اخوكى

ساعات الولد بيعبر عن حبو ليكى بطريقتو

وهى دى طريقتو ف التعبير

اما انو بيعايرك بموضوع الجوز او الخطوبة

ف انا لاحظت الموضوع ده ف كل بيت

ومنهم انا شخصيا ده غير انو بيتريق عليا ويقولي ان البنات عندو ف الجامعة احلي منى

وبيورينى صورهم ع الفيس وبيعمل مقارنة وبنقعد نضحك

خدى الامور ببساطة هتلاقي نفسك ارتاحتى

لو قالك كده اضحكى وهزري معاه هتلاقي علاقتك اتحسنت بيه اكتر واكتر

ولو في مشكلة احكيلو

هو بناء علي تصرفاتك هيتغير

عارفة ليه لانك بتخليه يحس بالمسؤولية اتجاهك

بالنسبة بقي للبيت وانك تطلعى منو, فده مش حلو لانك كده بتبعدى عن اهلك حبة حبة وده مش كويس

اطلعى اتكلمى وشاركى ف الكلام واضحكى وهزري

هتلاقي نفسك نسيتى كل كده

اقعدى فكري انك تتعلمي حاجة وكل ما تخلصي من حاجة اتعلمى حاجة تانية

وهكذا هتلاقي نفسك اتحسنتى :)

مع تحياتى :
هـــيـــامـــ ســـالـــمــــ

إقرأ المزيد

عايزة اتخطب مشكلة كل بنت

في بعض الاحيان بصادف بنات كويسين 

 حلوين وعلي ادب واخلاق وكمان تعليم وثقافة  كويسيين 
بس بلاقي مشكلة عندهم او ممكن نقول المشكلة دى موجوده عند كل الناس 
وفي كل حاجة بتكون موجوده , بس انا هركز علي البنات , لان مدونتى ليهم فقط 
وكمان هركز علي مشكلة معيينة لانى ملاحظة انها الشغل الشاغل للبنت وللبيت عندها وخصوصا والدتها 
وممكن كمان اصحابها (حسب نية كل واحده فيهم 0_o)
او من الاخر 
مشكلة شاغلة المجتمع كلو 
بس زى ما قولت انا هركز علي الجانب البنوتاتى 
والمشكلة هى الجوااااااااااااااااااااااااااااااااااااز 
نلاقي البنت ف اعدادى وقاعده تحب وده اللي هيخطبنى وده اللي هيتجوزنى 
وده وده ....................
وترسم احلام وردية 
طيب هتقولو انى عدوة الحب 
لالالالالالالالالالالالالالالا 
ع فكرة انا رومانسية درجة اولي 
مش كده وبس , انا كمان مقتنعة بموضوع الجواز عن الحب او اقتناع (اعجاب )
نلاقي البنت دخلت ثانوى تبدا تبص للبس وتكلم عن الشاب ده والشاب ده وده حلو وده مش عارفة ايه 
تدخل الجامعة الاقي كيلو ميك اب ع وشها ومش بعيد تدخل واخده شاب ف ايدها واسمو حبيبها 
طب ده ينفع , طيب ده يرضي ربنا 
 مش بالطريقة دى هنلاقي الجواز او الانسان اللي هيحبنا
لان ده اسمو حب مراهقة 
هتقولو ايه علاقة ده ب ده 
للاسف الموضوع كلو متشابك ^_^
بمعنى لازم تبدا الاول  
(ملاحظة :انا كان عندى اراء في الموضوع ده ,بس حبيت اخد راي البنات ,وعشان كده عملت موضوع ايه الل بيخلي البنت تفكر ف الخطوبة والجواز , والبنات قالو كتير من اللي كنت بفكر فيه 
وكمان قالو حاجة نسيت اقولها 
وده للامانة في مدونتى 
البنات دول بيمثلو مجتمع مصري 
وهم بنات منتدى معروف جدا ومشهور )
(منتدى فتكات )
نكمل 
الاسباب اللي بتخلي البنت تفكر في الخطوبة والجواز 
(البيت  , الاصحاب , المجتمع , الفراغ العاطفي )
البيت: 
ضغط الاهل علي البنت , هم بيحبوها بس اتصرفو غلط 
زى الدبة اللي قتلت صاحبها 
هى مش بتكرهو ولكن حبها ليه مخلهاش تفكر وخلاها تقتلو 
كذلك الاهل بيفضلو يضغطو علي البنت بالكلام 
ساعات بتوصل لتصرفات ,بتعقد البنت وبتكون تتمنى عايزة تتجوز بس عشان تخلص من كلامهم وتصرفاتهم اللي بقت ضددها في كل حاجة, ومن ضغط الاهالي برضو بيخلوها تتسرع في ارتباط بيندمو عليه في المستقبل 
وده سبب من اسباب الطلاق الكتير
غير بقي ضغط البيت في اصلا اهل مش مهمين بوجود بنتهم او باللي حاسة بيه 
ميعرفوش هى مضايقة من ايه ومش عايزة وعايزة ايه 
مش بيدوها فرصة للتعبير عن رايها 
وده بيخليها تفكر تتجوز وتتحطب عشان تكون محور حياه شخص واحد يفكر فيها ويهتم بيها 
 ياريت لو حد من الاهالي شايف كلامى ده 
يعرف انو اللي بيعملو بيقلب بنتيجة عكسية علي البنت 
سواء في تصرفتها او في شخصيتها ونفسيتها كمان 
انتو 
وف الاخر انتوا اللي هتشيلو كل اللي هيحصل من مشاكل غير متوقعة من تصرفاتكم 
الاصحاب:
في بنات كده تحسي انها شيطان في شكل انسان 
تصاحبك عشان تعقدك في عشتك 
انا بحب كذا وعملي كذا وهيخطبنى وهيعمل 
ولما يخطبها مثلا 
تحسي انها بتذل البنت 
انا عملت اللي معملتهوش 
(ده مش كل البنات دول اصناف معينة :) )
وفي اصحاب طيبين بس ساعات بيحكو كلام مينفعش يتقال 
لانو غصبن عنها البنت نفسها في انسان يحبها ودى غريزة فيها 
سواء عندها مشاكل او لا 
ف ياريت كل بنت مخطوبة تاخد بالها وهى بتكلم قدام صاحبتها 
انتى ربنا كرمك الحمد لله 
اعتقدانك ف يوم كنتى حاسة نفس احساسها 
فليه بتنسي الاحساس ده لما بتتخطبي 
المجتمع :
المجتمع ده مش عارفة اقول ايه عنو والله 
خصوصا المجتمع العربي 
حاشر نفسو ف كل حاجة ولازم يعرف كل حاجة 
طيب دى اسرة انتو مالكم بيها 
لازم يعرفو الراجل مرتبو كام 
في مشاكل ولا لا 
البنات التخطبو ولا لا ولو مش اتخطبو 
ويقعدو زن زن زن زن زن زن 
وليه والبنت حلوة ومش عارفة ايه 
ومنها تطلع الاشاعات بسببهم 
مش ممكن البت بتحب ...... يبقي البت بتحب 
مش ممكن البت عملت حاجة كده ولا كده ... يبقي البنت عملت حاجة بس احنا مش متاكدين
ف الجلسة الجاية هنتاكد ونبلغكم 
واللي يعصبك انك تلاقيهم لو حد نطق حرف عنهم 
يقلبو الدنيا 
طيب حب لاخيك ما تحب لنفسك 
زى ما انتو مش تحبو حد يحكى عنكم انتو برضة مش تحكو عن غيركم 
لدرجة ان لو البنت لو خطبت وسابت خطيبها يبقي البت عملت حاجة 
وااااااااااااااه بقي لو كان مكتوب كتبها واطلقت قبل الفرح 
يبقي اكيد دى عملة حاجة والا مكنش طلقها 
دخلتو انتو ف نفسيات الناس وعرفتو السبب 
لا وايه لو حد سال ياعينى ع البنت 
خاطبة مرتين اكيد في حاجة بس معرفش ومش متاكده 
او دى كانت مكتوب كتابها واطلقت قبل الفرح 
الله اعلم من السبب 
مهو انتو كده بتقولو للعريس مش تاخدها 
انتو مالكم 
اعرف انتو مااااااااااااااالكم 
الفراغ العاطفي :
اي بنت في الدنيا دى كلها من وهى صغيرة 
وهى عندها غريزة الامومة 
نفسها تتجوز وتحب وتتحب البنت بطبيعتها رومانسية 
بس بيزيد الموضوع ده 
لو مفيش حاجة تشغلها وغصبن عنها بتفكر ف الانسان اللي هتتجوزو الاطفال شكل بيتها والمشاكل اللي هتواجها وازاي تحلها 
والموضوع ده بيوصل لمرحلة بجد وحشة لما البنت بتتعرض لل 3 اسباب اللي فوق 
عشان تحقق حلمها وفوقها تخلص من ضغط اهلها وضغط وكلام ونظرات المجتمع وتفرح زى اصحابها وتبقي مخطوبة وتفرح وتلبس الفستان زي اصحابها 
وتتكلم زيهم وتتناقش معاهم زى ما كانو بيعملو 
 اتحول حلم البنت من حلم بسيط جميل 
لكابوس لازم تصحى منو يوم فرحها 
واخيرا احب اقول لكل واحده وللمجتمع وللاهل 
الجواز ده رزق وليه وقت لو عملتو ايه لا هتقدموه ولا هتاخروه 
ولكل بنت اشغلي نفسك في التعليم وخدى شهاده واشتغلي واحلمى ببيت واسرة واطفال بس اعرفي ان ده ليه وقت محدد 
وسيبك من كلام الناس لا هيودى ولا هيجيب 
ولا هينفعوكى لو انتى اتسرعتى بسبب كلامهم وبيتك هيتخرب بسبب انكم مش متفاهمين 
ولا هينفعوكى لو طلع الانسان ده وحش ومش يستاهلك 
فكري ديما في نفسك واختاري الافضل لنفسك 
لان الناس ملهاش غير الكلام وبس 
يارب اكون عرفت افيد بنت واحده ورسمت علي وشها ابتسامة جميلة
مع تحياتى :
هـــيــــامـــ ســـالـــمـــ

إقرأ المزيد

حلل شخصيتك بنفسك

السلام عليكم 

انا هستعين ف مدونتى بكتاب الدكتور ابراهيم الفقى رحمه الله 

ده غير لو في بنات حبت تشاركنا مشكلة ونحلها ونستفيد منها لو هى حبت ان حد يستفيد منها 

ندخل ف الموضوع 

ممكن تقولو مجبتيش حاجة جديده وانه ممكن نشتري الكتاب عادى جدا 

بس انا شايفة انو لما نتشارك في الكتاب جميعا هيكون شئ حلو هنساعد بعض 

 فكتير من الحاجات 

انا هبدا ان شاء الله ب اول حاجة ف الكتاب ويارب تستفيدو منها :)

..............................................

هنبدا الاسئلة وياريت كل واحده تجاوب بصراحة وتكون كل واحده معاها ورقة وقلم والمكسلين يقومو يفتحو الوورد ويسجلو 

الاسئلة دى انا مليش دعوة ب اجابتها انتو اللي هتتعمقو ف نفسكم بعد ما تشوفو الاجابة و هوضح ان شاء الله ازاي 

بسم الله الرحمن الرحيم

1- هل انتى سعيده ؟
2-هل انتى فخورة بما تقومى بيه من اعمال ؟
3-هل تعملين في المجال الذي تحبيه وكنتى تتمنى العمل به ؟
4-ما اهتماماتك والاشياء التى تستهويكى ؟
5-ما الشئ الذي تستمتعين بعمله اكثر ؟
6-ما اهدافك سواء في مجال العمل او خارجة ؟
7-ما نوع وطبيعة العمل الذى تحبي العمل فيه ؟
8-ما الشئ الذي تستطيعين ان تؤديه ببراعة؟
9-كيف ينظر الناس اليك وماذا يعتقدون عنك؟
10-ما نقاط القوة الخاصة بك ؟
11-ما نقاط الضعف الخاصة بك ؟
12-اين ترغبين فى ان تعيشي ؟
بعد ما تجاوبي
هتمسكى كل سؤال وتشوفي اجابتو وتقولي ليه انا جاوبت كده

مع تحياتى :
  هـــيـــامـــ ســـالـــمـــ

إقرأ المزيد

مين انا ؟؟

مين انا ؟ 

لحد دلوقتى انا معرفنيش 
بس بحاول علي قد ما  اقدر اوصل ليا 
جربت حاجات ووقفت عنها 
يمكن لانها مش تناسبنى 
ممكن لانى زهقت منها 
ممكن لانى لسه معرفتش انا ايه وعشان كده معرفتش ايه اللي يناسبنى وايه اللي مش يناسبنى 
بس اللي اعرفو انى اللي اتعلمتو  بزود ليا معرفة وخبرة 
علي الاقل لما حد يتكلم ابقي عارفة هو بيقول ايه 
وده اكتر حاجة اعرفها عن نفسي 
انى اتكلم مع حد ومعرفش هو بيقول ايه مش موجوده في قاموسي 
لازم اعرف كل حاجة طالما انا عايشة 
مع تحياتى :
هـــيـــامـــ ســـالــــمــــ

إقرأ المزيد

انا بحب انا

زى ما قولت في وصف مدونتى انى اكتشفت 

 ان انا بحب انا 
ايوة مش تستغربو 
كل انسان ليه صفات مميزة بتخليه مختلف عن اي حد حتى التوام اللي متشابهين في كل شئ 
مختلفين ف الطباع والصفات 
وده بيخلي كل واحد فيهم مميز بصفاتو 
بس في ناس مش بتحب نفسها او نقول انها مش بتحب صفاتها 
ممكن الناس يخلو الانسان يكره نفسو بسبب صفاتو 
والانسان ده عليه الدور انو فعلا يكره نفسو 
ويحول صفاتو من شئ ليه نقطة قوة وشئ محبب للاخرين لشئ سئ جدا 
انت في ايدك انك تخلي الناس تحبك بنفس صفاتك 
او تخلي الناس تكرهك برضو بنفس الصفات 
اول خطوة تعملها انك تحب نفسك 
ومهما الناس قالو خليك واثق في نفسك 
بس بجد مش اي كلام 
ثقتك بنفسك هتغير راي الناس فيك للشئ اللي انت عايزو 
مع تحياتى :
 هـــيـــامـــ ســـالـــمـــ 

إقرأ المزيد