هذه الصفحة مخصصةللفتيات فقط ^_^
في كومينت بسيط تقدري تقولي مشكلتك وان شاء الله نحاول نحلها مع بعض ^_^
لو في مشكلة في نظرك مش تقدري تقوليها هناعشان مكسوفة تقدري تبعتيلي رسالة بالمشكلة ^_^
مع تحياتى :
هــــيـــامـــ ســـالـــمـــ
في كومينت بسيط تقدري تقولي مشكلتك وان شاء الله نحاول نحلها مع بعض ^_^
لو في مشكلة في نظرك مش تقدري تقوليها هناعشان مكسوفة تقدري تبعتيلي رسالة بالمشكلة ^_^
مع تحياتى :
هــــيـــامـــ ســـالـــمـــ
المشاركات
يوجد 2 تعليق على التدوينه
إزاي أتخلص من ضغط أهلي عليا وخصوصا أمي الي بتخلي قرايبي يدخلو عشان يقنعوني أوافق مع العلم مبكونش حاسة بأي نوع من القبول النفسي ولا الشكلي ولا حاسة بأي شعور تجاه الشخص دا خالص وبتعب من الضط عليا لما أقول أنا مش مرتاحة ومش حاسة بقبول يقلولي هتحسي لما تقعدي وتتكلموا سوا ولما تتخطبي كل حاجة هتتغير وهتحبيه والحب بيجي بعد الجواز وتعبت من أصرارهم وكلهم بيكونوا ضدي ويقولوا محدش هيتقدملك تاني والبنت ليها زهوة والقطر هيفوتك وكلام كتير بيوجعني وأمي حاليا زعلانه مني وبتقولي عمرك ماهتبقي سعيدة طالما مش موافقة علي الإنسان دا طب أعمل أيه وأفهمها أزاي تعبت أوي عايزه حل أقدر أتعامل معاها ومش تقولي الكلام براحه لأن حاولت أكتر من مره أكلمها بس هي بتصدني ومش متفاهمه معايا خالص ومبتسمعش لرأيي وعلي طول تكرهني في نفسي وتقولي محدش هيبصلك :/ أنا بعيط أوي محدش واقف في صفي ولا حد بيدافع عني والأخر كله يقولك هي أمك وبتحبك وعايزة مصلحتك وسعادتك طب ماهي سعادتي مفيهاش راحة تقولي أمي هو أنا برميكي في بحر ياشيخه وافقي بقا وافقي علي كلام أهلك ومش تخلينا نغضب عليكي هنسيبك البيت كله ونمشي وخلت بابا يسخن عليا مع أنه واقف في صفي بس من كتر كلامها بقوا كلهم عليا ومبقتش عارفة أعمل أية وحتي نفسي أطور من نفسي وأخد كورسات عشان أشغل نفسي بس أمي بتقولي الجواز وكلام من دا وحتي لما أقعد ع النت يقلولي متقعديش ولما رفضتت عرسان يقلولي أنتي بتحبي حد وفي حد في دماغك والله انا مبحبش ولا بصاحب بس كلام الناس حواليا كتير وتعبوني أي حل أقدر أتعامل مع المجتمع وأفكاره دي ؟
بصي يا قمر من قبل ما هبدا , عايزة اقولك علي حاجة (كل ده بيحصل في كل عيله عندها بنت علي وش جواز :) متزعليش نفسك )
الاهل ديما هتلاقيهم مختلفين معاكى في افكار معينة وده طبعا باختلاف الجيل وطريقة التفكير
وكمان الرسول عليه السلام قال (اننا نطيع الوالدين الا في معصية الخالق )
يعنى من الاخر الوالدين هيعملو حاجات كتير من وجه نظرهم صح ممكن (ينسو فيها الدين )
لان عندنا في الدين مينفعش نجبر بنت تتجوز واحد معين
هم بيجبروكى باسلوب ( الزن ) عشان انتى تقولي ( اه ) يبقي كده حققو الشرط ان البنت ( وافقت )
وده اصلا غلط مينفعش نفصل الدين علي مزاجنا
اه هم خايفيين عليكى بس هيكون زى ( الدبه اللي قتلت صاحبها ) مع انها برضو كانت خايفة عليه
*** حسسيهم انك مقدره خوفهم ده , دى اول حاجة تعمليها , و دى سهلة , اجمعيهم كلهم ,
- قوليلهم اللي انتى حاسة بيه
- قوليلهم انك لو بتحبي هتقولي ليهم ومش هتخبي عنهم
- كل الموضوع انك مش زى البنات صفاتك واخلاقك مش زيهم لان اهلك ربوكى كويس , وان( الطيبون للطيبات ) والطيبون في الزمن ده قليل , وعشان يجيلك واحد شبهك دى صعبة لانك متربية كويس
- اساليهم انتو متاكدين اي واحد من اللي اتقدمو وانتو عايزيين منى اوافق عليه
اخلاقو زى اخلاقي , متربي زى ما انتو ربتونى ؟؟؟
- طب انتو تعرفو مواصفات الشخص اللي انا عايزاه ؟؟
- لو انتى مكانى يا ماما واتقدم واحد هتوافقي عليه عشان كلام الناس وان محدش هيبصلك ؟؟
- طب لو انا وافقت واتخطبت وطلع مش كويس ليا , هكمل معاه بسبب كلام الناس ويبقي بدل ما يوم فرحى يبقي اسعد يوم في حياتى , يبقي يوم بدفن نفسى بنفسى في النكد والحزن وانى هتبص للبنات المبسوطة في جوزاها
وممكن اكون جبت طفل , وفي الوقت ده اكتشف انى مش قادرة اكمل وانفصل عنه (الطفل ده يروح فين )
مهو اما اكمل عشان الطفل وافضل اتعذب وابقي انسانة غير اللي كنت عليها بسسب التعب
او ابعد ويطلع الطفل وقتها متعقد من ابوه و امه
والسبب في كل ده ( انتو )
- ليه مش مقتنعين انو مهما اتاخر الموضوع ده خير ليا ؟؟!! وان ربنا قال (وعسي ان تكرهو شيئا وهو خير لكم )
- قوليلهم انا بنت زى اي واحده بتمنى يكون ليا بيت و اسرة بتمنى افرح والبس فستان الفرح
بس ده مش معناه اي واحد يتقدم اقبل بيه , الفلوس والشقة مش كل حاجة , ممكن يكون معاه فلوس الدنيا وعلي قدر من الجمال واخلاق , بس انا مش قادرة اقتنع بيه , مفيش بينى وبينه تفاهم ووقتها الاخلاق والفلوس وكل اللي انتوا حاولتو تقنعونى بيه عشانه هيروح ومش هيبقي غير المشاكل وف الاخر انتوا السبب (ظلمتونى وظلمتوه )
___________________________________
هو انتى بتصلي صلاه استخارة ؟؟!!
لو بتصلي صلاه استخارة بعد ما اتقابلي العريس حتى ( لو مش حاسة بقبول )
وقتها اعتمدى علي كل حاجة هتحصل بعد الصلاه , لو الموضوع مشي يبقي ده خير ليكى , ولو وقف يبقي مش خير ليكى ومهما حصل من اهلك حاولي تستوعبيه , هتتبهدلي دلوقتى بس هتكسبي سعادتك بعد كده
_______________________________________
اهم حاجة انو لما يكون في عريس لازم تعرفي عنه الاساسيات هو بيشتغل فين اهلو مين وعايش فين ؟؟
مستواه التعليمى ايه
لو لاقيتيه مسواه التعليمى كويس (مش اقل منك ) لو اقل منك هيغير
متربي في منطقة كويسه (باباه ومامتو موظفين ) لان طريقة التربيه مهمة اوى
قابليه واتكلمى معاه عادى جدا , حسيتى بقبول خلاص( وهو حس بقبول) اطلبي تقعدى معاه تانى واكيد وقتها الكلام هيختلف
محستيش بقبول , قولي لاهلك وهم كده هيسكتو
_________________________________
اششغلي نفسك ب كل حاجة بتخططى ليها ,
ممكن تكسلي بسبب اللي اهك بيعملو , الانسان طريقو مش هيكون كلو سهل , لازم تقابلي مطبات في حياتك
وكمان حاجة قربي من ربنا ^_^
كل ما تسمعى حاجة منهم ابتسمى في وشهم , وقولي انا عارفة ان انتو خايفين عليا ومقدراه , بس ربنا مش كاتبلي اتجوز دلوقتي
مع تحياتى :
هــــيـــــام سالم
شاركنا برأيك واترك تعليقك هنا
هكون سعيده بمشاركاتكم