اختيار العريس المناسب

انا كنت متوقفة عن التدوين لفترة , من فترة بسيطة حاولت ارجع تانى , بس زى ما بنقول خطوة خطوة 

النهارده انا هرجع للتدوين هنا بموضوع جديد  وهو ( اختيار العريس المناسب )

بصو يا بنات عشان يجيلك عريس كويس 

لازم كل بنت تكون حاطة في راسها كام حاجة اساسية

1- مش تقابلي اي عريس 

2- لازم يكون العريس مش اقل منك في المستوى التعليمى 

3- الاب والام مين (يعنى بشتغلو ولا لا وشغلهم ايه )

4- المكان اللي عايش فيه 

5- اخلاقو ايه ؟؟

____________________

زى ما انتوا عارفين لما بيكون في عريس بيتقدم اكيد اهلك بيسالو عليه 

ومنها هتعرفي اجابات الاسئلة اللي فوق 

طيب يجي سؤال ويقول وده هيساعدنى اختار ازايي عريس كويس ومناسب ليا ؟؟؟

بصي يا قمر انتى وهى 

لما تحددى الصفات دى للعريس اللي هتقابليه 

يبقي كده انتى ماشية صح وهقولك ليه بعد ما اشرح كل حاجة بالتفصيل في الاخر 

_________________________

1- مش تقابلي اي عريس :

مش اي واحد يتقدم تروحى تقابليه , يابنات انتو مش فيكم عيب عشان اي حد يتقدم تجرو علي طول 

كل واحده مكتوب ليها هتتجوز امتى , بس اصبرو 

وسيبكم بقي من كلام الناس , كترة العرسان مش هترفع من قيمتك انتى مش بتحققي الرقم القياسي في اكبر عدد مقابلة عرسان , لازم تكونى حاطة حدود لاي عريس يتقدم عشان لما يتقدملك مثلا 3 او 4 فيهم نفس الصفات اللي انتى محددها اللي هيفرق بس مين اللي ارتاحتى ليه

الصفات هى اللي هكتبها تحت  

__________________

2- لازم ميكونش العريس اقل منك في المستوى التعليمى:

مش الاقي بنت دكتورة وراحة تقابل واحد اقل منها في المستوى التعليمى (تجارة او اداب ) 

انا والله مش بقلل من حد بس مش كل الرجالة اللي اقل في المستوى التعليمى هتخلي مراته تشتغل وتحضر 

وتعلي وهو في مكانه 

هتلاقيه هيبدا يغير منك , ويبدا تتغير معاملته ليكى عشان يحسسك انه اعلي منك ديما ( حتى لو بيموت فيكى ) , وممكن يتمنظر بيكى انا مراتى كذا وبتحضر وهتبقي كذا ( والله بنت قالت كده انه بيموت فيها وانتخطبو بس لاقته كل شوية يتمنظر بيها قدام الناس )

_________________________

3- الاب والام مين (يعنى بشتغلو ولا لا وشغلهم ايه ):

بصو يا بنات شغل الاب والام مش عشان منظره وهو اهلو كذا لا 

شغل الاب والام ده عشان تعرفي هو اتربي ازاي 

لانه للاسف في بنات كتير اعرفهم متجوزين 

ناس اخلاق وتدين وعلي قدر من الجمال المقبول كمان , ماشاء الله , وبيحبوهم 

بس للاسف التربيه بتقف كعائق قدامهم لان تربيته مختلفه عنها وتحصل كوارث بسبب الموضوع ده 

والله بتوصل لطلاق 

وظيفة الاب والام دى لانها بتعرفك هم علي اي قدر من التعليم والثقافة وازاي هيكونو مربيين ابنهم 

قفط لاغير (مش عشان منظرة ولا حاجة )

____________________

4- المكان اللي عايش فيه:

طبعا البيئة اللي العريس جاي منها مهمة جدا لانه اكيد هيتاثر بالبيئة اللي هو عايش فيها 

فلازم تعرفي هو عايش فين لانه غصبن عنه لازم يلتقط اي شئ من البيئة دى خصوصا لو ليه اصداقاء من نفس البيئة 

_____________________

 

5- اخلاقو ايه ؟؟

طبعا لازم تعرفي اخلاقو ودى هتتعرف لما يتسال عليه 

وكمان خدى بالك من ردود افعالة 

لازم تعرفي اذا كان من النوع اللي بيتعصب بسرعة 

وممكن ايدو تترفع ولا لا 

عشان اكيد اي بنت متحبش الانسان اللي ترتبط بيه بقيت حياتها يمد ايدو عليها في يوم من الايام 

_______________

تخيلي بقي كل واحده فيكم حددت الصفات الاساسية دى لكل عريس هتيقدم ليها 

بعد كده بتشوفى فيه الصفات اللي هي بتحلم بيها سواء في الشكل او ايا كان 

فكل بنت ليها مواصفات معينة هى بتحلم بيها تكون في الانسان اللي عيزاه 

الله يرضي علي كل بنت بعد ما تقابل اي عريس 

تصلي استخارة عشان ربنا يكرمها 

(صلاه الاستخارة مش بتكون احلام , صلاه الاستخارة اما بتمشي الموضوع او بتوقفه )لانك بتطلبي من ربنا 

لو هو خير يقربه منك ولو هو شر يبعده عنك

وخليكم واثقين في اختيار ربنا ليكم  

مع تحياتى :

هـيــام سالم 

إقرأ المزيد